It look like Houdini living right here!

De Bellcrier, like everybody else and while not pointing blame, still trying fuh figure out how two planes get away without anybody knowing. Some asking if Houdini come fuh a special performance and disappear without anybody knowing just like de planes. People who does travel to foreign would know that at de airports, planes does have to line up waiting, sometime long, fuh permission just fuh tek off. De people authorising de take offs does wuk 24/7 and always looking! Dem eyes don’t miss anything! In other words, it not easy fuh two planes just “mistic” and nobody ain’t know! In this case it wasn’t one; but two!

Everybody know that planes does mek nuff noise. That is why de workers, including dem with de two tennis paddles in dem hands directing de planes pun de tarmac, does wear headphones fuh protect dem ears. Even when yuh teking a sound sleep in yuh hammock de noise does wake yuh up even though de plane deh miles up. Up to now, dem ain’t design silencer fuh plane engines! So people asking how come with all that noise fuh start up de roaring engines, taxi to de runway and tek off, people didn’t know! Even if one catch yuh napping, how yuh explain de second one?

Some now hollering that this is a place of plenty unexplained things, just like some vendors trying fuh get a explanation as to why dem can’t hang up dem fruits fuh display pun dem stalls. People who does do shop business know that display is important. De same vendors hollering how profits disappearing with all de new and higher fees now. De Bellcrier hear that even some of de vendors disappear! Things tuff dem seh! De news gat a back-and-forth story about what this side seh and what that side seh about some US$5 million that claim to disappear after a big sale. Some now believing that Houdini didn’t just appear and then disappear! Dem believe he might be living here! After all, somebody gat fuh get blame! Ting-a-ling!