Dear Diary,
Is me Nagga Man again. Ah cyaan believe how dese people bad minded, so. Yuh believe dey bring up dat new cyaar story again? Dat story like dem silent fart…’e jus’ na go ‘way. But is je’lous, dem je’lous.
I is de Prime Moocher of dis land! Is wha’ wrang if me get wan shine ride? Me whole life I waitin’ fuh a shine ride fuh show dem bais in Berbice how me tu’n Big Shat!!. An’ when I get waan, yuh t’ink me guh get wan ordinary waan?? Schuups!!
Edge Bill bring up wha’ mek de Big Toyota Lan’ Cru’sah tek suh laang fuh delivah. Well as de Prime Moocher of dis land, dem had to prepare de cyaar special. No Dear Diary….was na fuh mek am bullet proof. Who guh shoot me? Ev’rybady know me na gat none powah. Me like Chrismuss Blow Blow.
Naa…was somet’ing dat show me na fo’get me root. Me a wan “son a de sile.” Dem had fuh put in wan bar fuh me! And dat is why de price jump from .5 million to million. Was no ardinary bar. Dis wan can mek bush rum jus’ like how abee use fuh mek am at de Sea Wall in Berbice!!
And Edge Bill wan’ fuh know wha mek dem had to pay all de money right away. Well, Dear Diary, like Edge Bill a wan priest or wha? Like ‘e na know about Bush Rum.
Yuh t’ink anybody guh put wan Bush Rum still in wan cyaar, befo dem get deh money?? Dat t’hin can blow up anytime!! Schuups…
Dear Diary, I done wid dem. I goin’ to me cyaar fuh tek wan drink ah dat good, fresh Bush Rum!!
